Doa untuk Purifikasi Lahan Dayak Mualang

RUMUSAN DOA UNTUK PURIFIKASI[1] LAHAN[2]

1. Sak, dua, tiga, empat, limak, enam, tujoh. Tujoh ke matahari tumoh, tumoh tuah, tumoh limpah, tumoh untong, tumoh nyarong. Tumoh adai, tumoh ada, tumoh kih, tumoh kaya, tumoh agong, tumoh tulong, tumoh pengawa, tumoh pengiran ganti raja.

2. Tok mah kami ngibau, kami ngitau, kami nipah, kami miah, kami ngibas, kami ngias. Mali adai tai kak ngaru, kak ngricau, kak ngetil, kak ngamil, kak ngempang, kak ngalang, kak nyempal, kak ngaral.

3. kami tok kak kerja, nebang nebas di tok.

4. kami suroh berkat, kami suroh selamat, isak nadai sipat rangau punai, tingang kayu besai, tacah isau simpai, telih beliung betangkai.

5. asa adai tai kak ngaru ngricau, teka kitap kah ngau sayap, kisai kah ngau langai, terapak kah ngau suak, renyok kah ngau patok, mati kah ngau taji.

6. suroh ayas ke alam babas, suroh temok ke alam rampok, suroh alit ke alam buket, suroh lenyau ke alam debau, suroh lelak ke alam rimak, suroh pulai ke alam natai.

7. Amat mah wan tok mit ari pipit, panak ari kejirak, besai ari punai, nak nemok ari empulok, nak tingik ari beruwek.

8. Uleh ukai wuan beruwik sekayu balek, pulai ngamek tanah tumoh. Bukai kenyalang sebuah lemang, pulai ngunang kampong jaoh. Bukai tajak sebuah lebak, pulai nyilak kiarak mudoh. Bukai kukok sbuah mungok, pulai nguyok buah ruroh.

9. Wuan betelok pulah ngkeran, beranak pulah ngkerungan, tinok pulah penepan, nama lamak penupek Nek Antan, pengidop kintak Kenian.

10. Uleh nuan nyau butang, ngukok tengah malam, Butang ngeraik jalai pian, butang birak tengah laman, butang mantok dalam capan.

11. Wuan tok purek nyau bekitau, tutos nyau bekibau, purek nyau menselan, tutos nyau nyemungan, purek nyau bebiah, tutos nyau betipah. Kebak tok wuan kami bunoh. 

TAHAP SELANJUTNYA MEMBERI MAKAN KEPADA PENGUASA TANAH (PUYANG GANA)..

1.      O...Puyang kami, tok pedarak, petumpak, ngau kami madah kedirik. Beuma betayak di tok.

2.      Tok ngau kami mintak, kami nanyak, kami nganti, kami meli, kami nukar, kami mayar,kami utang, kami malas, kira ulon kami lepas.

3.      Nema wuan tai empu buket, mpu bukau, mpu tapang, mpu lalau, mpu rian, mpu sibau, mpu lubok, mpu lanau.

4.      Mpu julot, mpu gupong, mpu lalau, mpu tikong, mpu laman, mpu pian, mpu aik, mpu sedan.

5.      Mali kami tetikek ke belitek, tetrajau ke sibau, te jelai ke pedalai, tetebang ke sengkabang, tetunan ke rian, tebunoh ke bukoh.

6.      Tok pedarak, pelumpak kami.

---

[1] Purifikasi dimaksudkan penyucian atau pembersihan lahan yang akan dijadikan ladang dari berbagai gangguan roh atau petaka.

[2] Paulus Florus (ed), Ngelala Adat Basa Dayak Mualang, Pontianak: PPSDAK Pancur Kasih, 2001, hlm 30-31.